Водич низ сè што е внатре. Трае пет минути и по него немаш што да бараш.
Ако те интересира само една работа, скокни на неа — деловите не зависат еден од друг.
1. Најава — без лозинка
Ја внесуваш својата е-мејл адреса, кликнуваш на копчето, и за неколку секунди ти пристигнува мејл со линк. Кликнуваш на линкот и си внатре.
Лозинка нема и нема да добиеш. Ништо не мораш да паметиш, а не постои ни лозинка што некој би можел да ти ја украде.
Неколку работи што вреди да ги знаеш веднаш:
- Линкот важи ограничено и се троши при првото отворање. Ако ти затреба нов, едноставно побарај го повторно, колку пати треба.
- Мора да биде истата адреса со која си се претплатил — линкот оди исклучиво на неа.
- Ако мејлот не пристигне за некоја минута, погледни во несаканата пошта, а кај Gmail и во картичката Промоции.
2. Денес — она што го отвораш секој ден
Ова е првата картичка и единствената што навистина треба да ја отвораш секое утро.
Без публика е утринска рутина од шест навики. Ја допираш онаа што си ја завршил и тоа е сè — бројот погоре покажува колку дена по ред ја држиш низата. Нема ранг-листа и нема споредување со други; единствениот со кого се натпреваруваш си ти од вчера.
Под тоа те чека задачата на денот — краток текст и една конкретна работа за правење. Се појавува во работен ден наутро. Постарите остануваат во архивата, па ако прескокнеш ден, ништо не е изгубено.
Тука е и најновата снимка, а кога ја има, и видео порака од мене.
3. Работилници — како да влезеш на Zoom
Работилницата е еднаш неделно, во живо на Zoom. Предвидени се 60 минути; прашањата на крајот често траат подолго, и тоа е додаток, не обврска.
Линкот за влез стои овде, во порталот. Не чекај покана по мејл и не барај линк на друго место — ја отвораш картичката Работилници и копчето е тука.
Секој термин има и детален опис што се отвора на стрелката, па можеш однапред да видиш за што станува збор.
4. Снимки — ако си пропуштил
Снимката од секоја работилница доаѓа овде, обично истиот или следниот ден.
Сите досегашни снимки ти остануваат достапни додека трае претплатата — не само оние од твоето доаѓање наваму. Ако влегуваш денес, целата библиотека ти е отворена од првата минута.
Снимката се пушта на клик. Намерно не се вчитува сама, за да ти се отвора картичката брзо.
5. Цели — каде си сега и каде сакаш да бидеш
Четири области: кариера и финансии, здравје и енергија, односи, личен развој. Истиот распоред како на работилницата за инвентура на состојбата.
За секоја цел впишуваш каде си сега, каде сакаш да бидеш и зошто ти е важно. Последното ти изгледа непотребно додека го пишуваш, а токму тоа го читаш оној ден кога ќе ти падне волјата.
Целта ја разложуваш на чекори. Кога ги означуваш како завршени, напредокот се пресметува сам. Ако нема чекори, сам кажуваш приближно каде си — 25, 50, 75 отсто.
Не знаеш од каде да почнеш? Покрај секоја област стојат примери. Кликнуваш еден, тој ти го пополнува полето, па го преобликуваш по свое. Туѓа цел полесно се поправа отколку што своја се измислува.
Целите ги гледаш само ти. Детално објаснување што значи тоа стои на самата картичка, под „Кој може да го види ова што го пишувам овде?".
6. Дневник — само за твои очи
Записот најлесно настанува од задачата на денот, но можеш да пишуваш и слободно, кога сакаш.
Со секој запис избираш како си тој ден — од исцрпен до полетен. За некоја недела од тоа излегува нешто што инаку не се гледа: календар на месецот, просек на последните седум дена, и споредба со минатата недела.
По еден месец добиваш и „Пред еден месец" — сопствен запис од пред триесет дена. Тоа е единствениот чесен начин да видиш колку си се придвижил.
Записите се шифрирани и не ги чита никој, ниту јас. Ако сакаш некое твое прашање да се најде на Q&A работилницата, покрај записот има копче за анонимно испраќање — копија од текстот оди во редот за работилницата без твоето име, а оригиналот останува овде недопрен.
Целиот дневник можеш да го испечатиш или да го зачуваш во PDF.
7. Книги — Читаме за вас
Насловите што ги обработуваме на работилниците и оние што би ти ги дал в раце да седиш спроти мене. Кај секој пишува зошто и за кого — список наслови можеш да најдеш каде било.
До книгите доаѓаш од картичката Денес.
8. Апликација на телефон
Платформата работи во прелистувач, но може да стои на почетниот екран како секоја друга апликација — без адресна лента, со сопствена икона.
iPhone: отвори ја страницата во Safari, допри го копчето за споделување (квадрат со стрелка нагоре) и избери Додај на почетен екран.
Android: Chrome обично сам го нуди тоа. Ако не понуди, отвори го менито со три точки и побарај Инсталирај ја апликацијата.
Кога апликацијата е на екранот, можеш да вклучиш известувања за нова работилница и за задачата на денот. Се исклучуваат на истото место или во поставките на телефонот. Не испраќам ништо освен тоа.
9. Претплата
Горе десно во порталот стои Претплата. Ја отвора страницата на Stripe каде сам ја менуваш картичката, ги гледаш фактурите или откажуваш — без да пишуваш никому.
Ако откажеш, пристапот ти останува до крајот на платениот период.
Во првите 14 дена важи гаранција за враќање: се јавуваш и ти го враќам целиот износ, без објаснување.
Нешто не е јасно?
Погледни ги прашањата и одговорите — таму се конкретни проблеми и решенија. Ако ни таму нема, пиши на podrska@resetirajum.com и се јавувам во рок од еден работен ден.